Earthquakes of Myanmar and Risk Management-5 မြန်မာပြည်ငလျင်နှင့် ဘေးအန္တရာယ် ထိန်းချုပ်ရေးအစီအမံများ
မြန်မာနယ်နိမိတ်အတွင်း ငလျင်အန္တရာယ်မြန်မာပြည် အလယ်ပိုင်း ဒေသများ
ပြည်မြို့ ငလျင် (၁၈၅၈)နှင့် မြေလတ်ဒေသငလျင်များ
လွန်ခဲ့သော နှစ် ၁၅၀ ခန့်က မြန်မာနိုင်ငံ မြေလတ်ပိုင်း ပြည်မြို့နှင့် သရက်မြို့ အနီးတစ်ဝိုက်၌ အင်အား ပြင်း ငလျင်တစ်ခု လှုပ်ခဲ့သည်။ အိန္ဒိယ ဘူမိဗေဒတိုင်းတာရေးက မှတ်တမ်းတင်ထားသည်။ ၁၈၅၈ သြဂုတ်လ ၂၄ရက် ဒေသစံတော်ချိန် ညနေ ၃နာရီ ၃၈မိနစ် လှုပ်ခဲ့သော ငလျင်ကြောင့် သရက်နှင့် ပြည်မြို့များ၌ ပျက်စီးမှုများ ရှိခဲ့ပြီး အောင်လံ၊ ပုဂံ၊ တောင်ငူ၊ ကျောက်ဖြူ မြို့များ၌လည်း အတန်အသင့် ထိခိုက်မှုများ ရှိခဲ့သည်။ အင်းဝနှင့် ရန်ကုန်မြို့များကလည်း ခံစားသိရှိကြရသည်။ ထိုငလျင်လှုပ်ပြီး မကြာမီမှာပင် မာန်အောင်ကျွန်း အရှေ့တောင်ဖက်ရှိ ဖော့စ်ကျွန်း (ရဲကျွန်း ?) ရေအောက် ငုတ်ဆင်းသွားသည်။ ထို ဖြစ်ရပ်များ ဆက်စပ်မှု ရှိသည်ဟု သုံးသပ်ကြသည်။
သရက်မြို့၌ ထိခိုက်မှု ပိုများသည်။ ဘုရားစေတီ အားလုံးနီးပါး ပြိုကျကုန်သည်။ အိမ်တွေလည်း ပြိုကျ ပျက်စီးသည်။ မြေပြင်လှိုင်းထကြောင်း သိရသည်။ (၁၉၇၅ ပုဂံငလျင်နှင့် ၂၀၀၃ တောင်တွင်းကြီး ငလျင်များ ၌လည်း အလားတူ လှိုင်းထ သည်ကို သိရသည်။) စေတီ အပေါ်ပိုင်းများ၊ ပရိဘောဂများသည် အရှေ့မြောက်-အနောက်တောင် လားရာအတိုင်း ပြုတ်ကျကြသည်။ မြစ်ဆိပ်၌ ဆိုက်ကပ်ထားသော ဒိုင်ယာနာ အမည်ရှိ သင်္ဘောသည် ရုတ်တရက် မြင့်တက်လာသော ရေအလျဉ်အတိုင်း တစ်နာရီ ၃ မိုင်နှုန်းခန့်နှင့် မျောသွားသည်။ မြစ်ရေတိမ် နေရာများ၌ ရွှံ့ရေများ ပွက်သည်။ မြစ်အောက်ခင်းပြင်သည် ရုတ်တရက် ရေပေါ် တက်လာကာ ခဏကြာလျှင် ပြန်ငုတ်သွားသည်ဟု မျက်မြင်ရှိသည်။ တိုက်တိုက်ဆိုင်ဆိုင် ထိုနေ့ညက လတစ်ဝက် ကြတ်သည်။
အောင်လံမြို့၌ ခပ်ကြမ်းကြမ်း လှုပ်သည်။ ခြေဖဝါးအောက် မြေလှိုင်းထမှုကို ခံစားသိရသည်ဟု ဆိုသည်။ ပုဂံရှိ စေတီ ဟောင်းအချို့ အနည်းငယ်အက်သည်။ တောင်ငူ၌လည်း မြေပြင်လှိုင်းကို သိကြသည်။ သို့သော် အပျက်အစီး မရှိ။ ကျောက်ဖြူ၌ အုတ်တိုက် အနည်းငယ် အက်သည်။ ပရိဘောဂများ လဲပြိုသည်။ ရေတွင်းမှ ရေများ လျှံကျကုန်သည်။ ပြည်မြို့လည်း ခပ်ပြင်းပြင်း တုန်လှုပ်ခံရသည်။ ရွှေဆံတော်စေတီတော် ထိခိုက်မှု ရှိသည်။ မြေပြင်လှိုင်းများကို သိသိသာသာ ခံစားသိကြရသည်။ ဟင်္သာတမြို့က စေတီများလည်း ထိတ်ပိုင်း ပြတ်ကုန်သည်။
ထို ပြည်မြို့ငလျင်နှင့် ဆက်စပ်သော မြေပြင်လှုပ်ရှားမှုကို မလေ့လာရသေးပေ။ ငလျင်ဖြစ်ရာ အရပ်သည် ရခိုင်ရိုးမ၏ အရှေ့ဖက် အစပ် ဧရာဝတီ မြစ်ကြောင်းတစ်လျောက် ဖြစ်နေသည်။ ထို့အပြင် ထိုနေရာ၌ ရေနံနှင့် သဘာဝဓါတ်ငွေ့များ ခိုအောင်း တတ်သည့် လွာတွန့်တောင်များလည်း အနောက်မြောက်-အရှေ့တောင် လားရာအတိုင်း အစဉ်လိုက် တန်းနေလေရာ မည်သည့် (ပြတ်ရွေ့)နှင့် ဆက်စပ်နေပါသည်ဟု ဆိုရန် မလွယ်။ ထိုအပိုင်း၌ ဧရာဝတီမြစ် အနောက်ဖက်ကမ်းများ မြင့်တက် မှုများလည်း ရှိထားရာ အရှေ့တောင်-အနောက်မြောက် လားရာရှိသော တွန်းတင်ပြတ်ရွေ့ Thrust Fault တစ်ခုနှင့် ဆက်စပ်နိုင်သည်။ ဥပမာ ဒုရင်္ဂဗိုလ်တောင်တန်းနှင့် အပြိုင်ရှိသော ရေနံ့သာ ပြတ်ရွေ့။
ဝေးသော အကြောင်းကမူ အိန္ဒိယမြေထုချပ်နှင့် မြန်မာ မြေထုချပ်ကြီးများ တွန်းတိုက်မှုသာ ဖြစ်သည်။ ရခိုင်ကမ်းလွန်မှ ရေငုတ်သွားသောကျွန်းမှာ ဤဖြစ်ရပ်နှင့် တိုက်ရိုက်မဆက်စပ်သော်လည်း ဘန်ဂေါ ထိစပ်ဇုန် တစ်လျောက် ဖြစ်တတ်သည့် ငလျင်ကြီးများ လှုပ်စဉ် သို့မဟုတ် လှုပ်ပြီးမှ လိုက်၍ ရွေ့သော အရွေ့ကြောင့် ဖြစ်သည်။ Post aseismic slip ဟု ခေါ်သည်။ ငလျင်ပြင်းအားကို ခံစားရပုံ ဖေါ်ပြချက် အရ ပုဂံငလျင် (ပမာဏ ၆.၅) နှင့် ဆင်တူသည်။ ထို့ကြောင့် ပမာဏ ၇.၀ အောက်သာ ရှိမည်ဟု ခန့်မှန်း ရသည်။
(ဆက်လက်ဖေါ်ပြပါမည်။)
ခရက်ဒစ်။ဦးတင်လွင်ဆွေ။
No comments:
Post a Comment